Колку литри гориво може да се наточи со просечна плата?
Објавено во: Економија 03 Ноември, 2017
Македонските возачи точат номинално најевтино гориво во Европа, но ако се споредат бројките за тоа во која држава колку литри може да се купат со просечна плата лесно може да се види дека овие трошоци се голема ставка за џебот на едно македонско семејство.
Во земјава, актуелната цена на безоловниот бензин БС- 95 е 64 денари за литар или 1,03 евра, а со поевтин бензин од нас во Европа, може да се пофалат само Романците, кои плаќаат по 0,99 евра за литар.
Во овој поглед, во најдобра позиција се граѓаните на Луксембург, кои со една просечна плата можат да купат 2.560 литри бензин. Во Македонија со просечна плата од 22.912 денари (370 евра) може да се купат 358 литри безоловен бензин. Најлоши меѓу земите- членки на ЕУ се Романците, кои со просечна плата купуваат едвај 397 литри. Германците може да купат 1.619 литри со просечна плата, Австријците 1.014 литри, а Швеѓаните 1.778 литри. Од друга страна, жителите на новите членки на ЕУ се на дното на листата. По Романците, најмалку гориво со просечна плата купуваат Бугарите 444 литри. Во Унгарија може да се купат 503 литри, во Словачка 549, а во Чешка просечните приходи се доволни за 706 литри бензин. Норвежаните со просечна плата можат да купат 2.005 литри иако плаќаат најскап безоловен бензин од 95 октани во Европа по 1,74 евра за литар.
Според податоците од АМСМ, од соседитe, најскапо се возат Грците, каде литар бензин од 95 октани се продава за 1,50 евра. Цената на ова гориво во Србија е 1,19, во Бугарија е 1,07 евра за литар, а албанските возачи плаќаат по 1,18 евра за литар. Безоловниот бензин е најевтин во Косово и чини 1,05евра за литар, во Турција литар чини 1,29 евра, а во Босна и Херцеговина 1,10 eвра. На хрватските бензински пумпи евросуперот 95 се продава за 1,26 евра. Црногорците литар гориво ги чини 1,22 евра, а Словенците за истата количина треба да платат 1,27 евра.
Во поглед на дизел-горивото, Македонија е убедливо најевтина во регионот. Kај нас, дизелот чини 0,84 евра за литар, a во Црна Гора за 1,09 еврa. Во Бугарија дизелот се продава за 1,06 евра, а во Албанија за 1,09 евра. Дизелот е најскап во Грција и во Србија, каде еден литар чини 1,24 евра.
Најавата дека од идната година ќе се зголеми акцизата, а со тоа и цената на дизел горивото за 3,54 денари, ќе погоди голем дел од македонските возачи, но и компании. Дизелот е најупотребувано гориво во земјава, а бројот на возила со дизел- мотор постојано е во раст.
Според последните достапни податоци од Државниот завод за статистика, кои се однесуваат на 2105 година, во земјава се регистрирани 383.833 автомобили. Најголем дел или 209.122 се бензинци, а 163.038 се дизелаши. Уред за погон на авто- гас имале вградено 10.896 автомобили, а 33 од регистрираните биле хибридни и електрични возила. Во последниве неколку години има нагорен тренд на бројот на дизел- автомобили, од кои најголем дел се половни возила донесени од странство. Бројот на дизелашите во 2015 година е дуплиран во споредба со нивниот број во 2011 година, кога тој изнесувал 85.426 возила.
Статистичките податоци за потрошувачка на нафтени продукти за август оваа година, а кои се горе- долу идентични и во претходните месеци, најдобро илустрираат дека дизелот е најупотребувано гориво. Во овој месец се увезени 107.650 тони нафтени деривати а од нив 57,7 отсто е дизел, кој се користи како погонско гориво за камионите, автобусите, градежни машини, но и за голем број автомобили. Моторниот бензин учествува со 12,4 отсто, а автогасoт (ТНГ) зафаќа 8 отсто во вкупната потрошувачка на нафтени продукти во Македонија.
(М.Б.)