Колку милиони евра земаа од дивиденда акционерите лани?

Добивај вести на Viber

Триесет и една македонска компанија лани исплатиле 165 милиони евра дивиденда и тоа е за речиси 40 отсто повеќе пари од тоа што било исплатено на акционерите во 2016 година, покажуваат официјалните податоци на Македонската берза за хартии од вредност. Ова е многу силен аргумент во прилог на охрабрување на потенцијалните инвеститори во акции, а воедно и за зајакнување на позициите на тие што веќе вложуваат во акции. Овој податок покажува дека вложувањето во акции има потенцијал и е многу конкурентно во однос на вложувањето во депозити или орочени влогови. Сепак мора да се има во предвид дека најважен е изборот на акции во кои ќе се вложи.

Ова е цитат од Годишниот извештај на Македонската берза за хартии од вредност „Во рамките на вкупниот број на котирани компании (107 котирани друштва) 31 друштво исплатиа дивиденди во 2017 година во износ од 165 милиони евра, што во споредба со 2016 година претставува зголемување за 38,6%. Зголемениот износ на исплатени дивиденди во 2017 се должи пред се’ на подобрените финансиски резултати на банките.“

Од официјалните достапни податоци на сајтот на Македонска берза се гледа дека бројот на компании кои годинава исплатија дивиденда за работењето лани е 21 што е за 32,2 отсто помалку од лани.Помеѓу нив најдобитни се веројатно три грчки акционери кои имаат мнозински пакети акции во „Стопанска банка Скопје“, цементарницата УСЈЕ и во прилепскиот Мермерен комбинат. Сите тие заедно имаат прилив по основ на дивиденда од 42,7 милиони евра.