Колку се подготвени Грците за решение со името?
Објавено во: Балкан 01 Април, 2018
Грчкото јавно мислење не е подготвено за решение.
71,5 проценти од Грците не прифаќаат сложено име со вклучен терминот Македонија, покажуваат резултатите од истражувањата од 2016 и 2018 спроведени од фондацијата за надворешна политика ЕЛИАМЕП, a пред две години тој број беше 57 проценти.
Дел од резултатите беа веќе објавени во весникот „Катимерини“ во февруари, како што тогаш објави МИА, додека пак сега, комплетното истражување беше презентирано на конференција во Атина.
На прашањето: „Кое решение би го прифатиле за името на соседната земја?“ во истражувањето спроведено во јануари годинава 22,5 проценти, одговориле сложено име, 71,5 проценти не прифаќаат име со терминот Македонија, а 6 проценти рекле дека не знаат или одбиле да одговорат.
Јоанис Армаколас, професор на солунскиот универзитет Македонија и шеф на програмата за југоисточна Европа во грчката фондација за надворешна политика ЕЛИАМЕП, за МИА рекол дека временскиот период во кој беше спроведено истражувањето, игра важна улога за добиените резултати , исто како што играат улога и протестите.