Комисијата за заразни болести ќе почека со препораката недела да биде неработен ден за сите: Засега мора да функционира проектот „Викенд без ДДВ“
Објавено во: Македонија 05 Октомври, 2020
Комисијата за
заразни болести на денешниот состанок констатирала дека е рано да дава
препорака во недела да не работи ништо. Членови од Комисијата за Фактор велат
дека етапно ќе даваат препораки во согласност со развојот на епидемиолкошката
состојба во Македонија.
-Тоа што вчера го препорачавме, а Владата го усвои, а кое се однесува на забрана на гостувања на пејачи, мини концерти, диџеи во угостителските објекти, седење на маса само по четворица и не толку гласна музика, сметаме дека ќе има резултати. Затоа и не препорачавме намалување, односно скратување на работното време. Во однос на прелогот кој сакавме да го препорачаме, а се однесува на тоа во недела да не работи ништо, односно тоа да биде неработен ден за сите, сметаме дека треба да почекаме, зошто токму за викенд функционира мерката на Владата „Викенд без ДДВ“, велат за Фактор од Комисијата за заразни болести.
-Освен што сега практично ќе се заштитиме ширење на корона вирусот, ќе може да здивнат и вработените во моловите чие работно време е до 22.00. Недела треба да се знае дека треба да биде ден за со семејството. Така функционира современиот свет, изјави завчера изворот на Фактор.
Истовремено потенцираат дека можни се и други рестриктивни мерки, но се ќе биде препорачувано во чекор со епидемиолошката слика и кривата на новозаразени. Ако има влошување и уште поголем број на новозаразени со корона вирусот, секако дека ќе препорачаат дополнителни рестрикции, истакнува изворот од Комисијата за заразни болести за Фактор.
Инаку, на денешниот состанок препорачале да нема публика на фудбалскиот натпревар меѓу Македонија и Косово што треба да се одигра в четврток.
А.Б.