Костадинов и Каракачанов се лутат затоа што македонската полиција отвори предмет за децата носени на средба со бугарски политичари

Добивај вести на Viber

Maкедонската полиција отвори предмет за случајот со „Мал битолски Монмартр“, по што има остри реакции од бугарските политичари. 

Полицијата по допрен глас  го известила ОЈО за случајот со културната установа „Мал битолски Монмартар“ која изминатиот период во неколку наврати однела деца во посета на Бугарија. Таму децата се сретнале со бугарски политичари.

Претседателот на  бугарската партија „Преродба“ Костадин Костадинов побарал бугарското Министерство за надворешни работи да излезе со осуда,  а осуда упати поранешниот министер за одбрана, Красимир Каракачанов.

„Македонското МВР покрена постапка против раководството на „Малиот битолски Монмартр“ затоа што културната установа однела деца во Бугарија и се сретнале со бугарски политичари, дури и со претседателот. Наместо да ја поздрави културната размена, блиските врски и заедничките иницијативи, македонското МВР се жали во медиумите дека децата учесници на културната манифестација се сликале со бугарски политичари“, изјави Каракачанов.

За посетата на децата  на својот Фејсбук-профил  на 4.јули информирал и претседателот на Бугарија, Румен Радев. Децата претходно биле и кај поранешниот бугарски премиер, Симеон Втори -Сакскобурготски, како и на гробот на неговиот татко, царот Борис Трети.

Посетата на Бугарија ја оствариле поддржани од Фондацијата „Бугарска Меморија“ на бизнисменот Милан Врабевски во рамките на проектот „Од двете страни на границата“.

Радев вчера не пропушти Илинденското востание да го поврзе со бугарски бунтовнички дух.