Ковачевски по седницата на СДСМ се сретна со американската амбасадорка: Ќе го поканам Петков штом станам премиер

Добивај вести на Viber

Идниот мандатар Димитар Ковачевски по вчерашната седница на Централниот одбор на СДСМ, на која беа дефинирани раководните функции на владеачката партија, денеска оствари средба со амбасадорката на САД, Кејт Мари Брнз.

На средбата присуствуваше и секретарот за меѓународна соработка на СДСМ, Бојан Маричиќ, актуелниот министер за правда.

На состанокот се разговарало и за процесите околу формирањето на новата Влада предводена од СДСМ, но и за односите со Бугарија.

„Како претседател на СДСМ и како мандатар за новата влада, ќе се водам исклучиво од принципите на заедништво, одговорност, посветеност и ефикасност, а тоа ќе го барам и од моите соработници. Мојот став и принцип е нула толеранција за корупција на секое ниво, особено за носителите на високи, јавни функции. За таа цел, ќе се посветам на јакнеење на капацитетите на институциите кои се борат против корупцијата. Ефикасно, одговорно и посветено“ рекол Ковачевски.

„Ги имаме исполнето сите услови за почеток на преговорите. Остануваме посветени на наоѓање решение со соседна Бугарија за да продолжи нашиот европски пат. По изборот за премиер ќе го поканам господинот Петков да ја посети нашата земја. За нас е најважно да направиме план, заедно со бугарската влада, за отстранување на блокадата час поскоро, секако со заедничко прифатливо решение. Ние треба да останеме посветени и ангажирани во разговорите со искрен пристап. Ако ист таков пристап има и новата бугарска влада, верувам дека е можно да изнајдеме компромис за отворените прашања.“ рече Ковачевски.