Краен рок за поднесување на барање за дополнителен грејс-период за ,,Ковид 3” кредитната линија е 11 декември
Објавено во: Финансии 07 Декември, 2021
Развојна банка на Северна Македонија АД Скопје, согласно задолжението од Владата и Анекс кон договорот за администрирање на фонд за микро и мали претпријатија, на својата веб-страница објави јавен повик со кој им се нуди можност на кредитокорисниците на кредити од третата бескаматна кредитна линија „Ковид 3“, да поднесат барање за продолжување на грејс-периодот и рокот на отплата на кредитите за 12 (дванаесет) месеци.
Согласно јавниот повик, компаниите треба да поднесат електронско барање до банката, кое може да се преземе од веб - страницата на банката. Барањето се прикачува електронски, на веб форма објавена во самиот повик. Како услов за одобрување на барањето за дополнително утврдување на грејс - периодот и продолжување на рокот на отплата на кредитот е кредитокорисникот, пред поднесување на барањето, да ги има подмирено сите доспеани обврски по основ на главница и камата по кредит од кредитната линија од Фонд за микро и мали претпријатија (Ковид 3).
Поднесеното барање за дополнителен рок и грејс–период, не го елиминира правото во иднина да се поднесе барање за отпуштање на долгот од 30 отсто од износот на кредитот, согласно утврдените критериуми наведени во договорот за кредит.
Јавниот повик и барањето за дополнителен грејс - период, како и упатството за поднесување на барањето се достапни на следниот линк.
Повикот важи заклучно со 11.12.2021 година, кога е и последниот ден за поднесување на барањата.