Креаторот на наративот за „метлата“ го потсети премиерот за очекувањата
Објавено во: Македонија 02 Мај, 2019
Актерот Драган Спасов, креаторот на наративот за „метлата“ која треба да заигра во Владата и во државната управа по претседателските избори, му испрати уште едно потсетување на премиерот Зоран Заев дека тоа се очекува од него по 5 мај.
Популарниот Дац на „Фејсбук“ објави монтирана фотографија на која лета на метла и на англиски јазик напиша „Доаѓам наскоро“ со што му порача на Заев дека од него се очекува да дели разрешувања на функционери кои не ги испорачале потребните резултати.
Истовремено премиерот Заев во синоќешното гостување во 24 Отворено најави дека веднаш по изборите ќе направи владина реконструкција во која ќе бидат заменети неколку министри Тој не сакаше лично да ги посочи министрите кои ќе бидат заменети, но рече дека реконструкцијата ќе опфати министри и од СДСМ и од ДУИ.
Никој нема да биде поштеден во реконструкцијата на владата, рече Заев, потенцирајќи дека тој веќе има предвид кој министри ќе бидат ставени под лупа.
Актерот Спасов на првата трибина на СДСМ по првиот круг од претседателските избори во Карпош му подари метла на Заев, за, како што рече, чистката која треба да ја направи.
- Затоа што јас сум првиот кој си поднесе оставка од морални причини, имам и морална одговорност да ја предадам оваа метла за чистката што треба да се направи. Ова ништо не е договорено, од Рептил е, има и лопатче каде може да се собере доста ѓубре. Јас отсекогаш сум го сакал СДСМ и сум гласал за оваа партија, сум се гордеел со оваа партија. Сигурен сум дека мојот иден претседател е Стево Пендаровски, рече тогаш Дац.