Критики за Себастијан Курц за учество на митинг на ВМРО-ДПМНЕ
Објавено во: Свет 29 Ноември, 2016
Шефот на австриската дипломатија, Себастијан Курц, деновиве е изложен на критики од страна на европските партии од левиот центар поради поддршката на ВМРО-ДПМНЕ на нејзиниот предизборен собир во неделата во Скопје.
Поранешниот челник на европските социјалдемократи во Европскиот парламентот, Ханес Слобода изрази жалење поради настапот на Курц, кој во рамките на својата дводневна посета на Македонија, присуствуваше на предизборниот собир на ВМРО-ДПМНЕ, каде во својот говор изјави дека Македонија е на добар пат и ѝ се заблагодари на Македонија на поддршката во справувањето со бегалската криза, пренесува Танјуг.
„Крајно време е Македонија да тргне по нов пат на основа на европските вредности. Затоа е особено за жалење што министерот Курц ги поддржа оние кои се одговорни за тешката ситуација во која се наоѓа земјата“- вели Свобода.
Од австриското Министерство за надворешни работи во соопштението до државната новинска агенција пишуваат дека Курц на предизборниот собир учествувал не како шеф на дипломатијата туку како претставник на Европската народна партија (EPP), чиј член е неговата Народна партија на Австрија (OеVP), како и ВМРО-ДПМНЕ. Потсетуваат и дека и германски претставник на владејачката CDU одржа говор на собирот во Скопје.
Курц рече дека неговото учество било оправдано, затоа што и други европски претставници биле на собири и митинзи кај другите партии во Македонија.
Вели дека неговата посета во Македонија се поврзува во многу димензии, од изготвување на акционен план за наредната година до координација на приоритетите за помош на Скопје да чекори напред во евро – атлантските интеграции.