Љајиќ се противи на воведувањето контрамерки кон Македонија
Објавено во: Балкан 04 Март, 2018
Во врска со проблемот околу извозот на српското брашно во Македонија, Расим Љајиќ, српскиот министер за трговија, за РТС денеска изјави дека е против воведувањето контрамерки кон Македонија, велејќи дека тоа би било лошо и за српските и за македонските бизнисмени.
„Извозот не е забранет, туку со тие вонцарински мерки и бариери тој е отежнат, а нашите извозници со тоа стануваат неконкурентни во споредба со другите. Ние сакаме рамноправен однос, како што предвидуваат правилата на Светската трговска организација и на ЦЕФТА“, рече Љајиќ.
Љајиќ додаде дека се обидува да го реши овој проблем со договор и компромис.
„Сакаме потполно слободен проток на стоки и во една и во друга насока. Подготвени сме да ги отстраниме бариерите. Предуслов за сето ова е повлекување на овој правилник“, изјави српскиот министер за трговија.
Српскиот министер за трговија, коментирајќи како сето ова ќе влијае врз српските мелничари, рече дека ова го прави нивниот извоз неиплатлив и дека ќе изгубат месечно околу 200.000 евра, доколку оваа мерка се задржи.