Љупчо Николовски: ДКСК ја поздрави мојата функција
Објавено во: Македонија 04 Септември, 2020
Љупчо Николовски, вицепремиерот задолжен за борба против корупцијата и криминалот, одржлив развој и човечки ресурси, напиша дека неговата нова владина функција била поздравена и од Државната комисија за спречување на корупцијата.
„На денешниот прв официјален состанок со Државната комисија за спречување на корупција - ДКСК, разговаравме за идната соработка во делот на откривање и спречување на корупција и воведувањето на механизми за непречено функционирање на ДКСК, како институција која има исклучително значење во оваа заедничка борба!
Точките за кои сме согласни, за мерките кои треба да се преземат се опширни и бројни. Со мојата нова функција, којашто ја охрабрува и ДКСК, ќе можам директно да асистирам во зголемување на ефикасноста и зајакнување на соработката со извршната власт!
Очекувам дека ќе имаме одлична соработка и ќе испорачаме силни резултати.“, објави Николовски по состанокот со антикорупционерите.
На средбата биле презентирани работата и надлежностите на вицепремиерот Николовски и на ДКСК, предизвиците поврзани со истите и можностите за меѓусебна соработка и координиран пристап во севкупната борба против корупцијата. На состанокот се отвориле повеќе теми и активности коишто треба да се преземат во следниот период, со цел исполнување на целта за спречување на корупцијата.