ЛОШИ ВЕСТИ ЗА ДИЛЕРИТЕ: Паѓа интересот за автомобилските кредити

Добивај вести на Viber

Бројот на автомобилски кредити е намален за 9,4 отсто на годишно ниво, покажуваат последните податоци на Народната банка на Република Македонија. Извештајот на централната банка за август носи лоши вести за авто- дилерите и ги потврдува нивните кажувања додека интересот за кредит за ново возило е во постојано паѓање. Од друга страна, не стивнува побарувачката за потрошувачки и станбени кредити. Годишниот раст кај потрошувачките кредити изнесува 12,2 отсто, а кај станбените 14,2 отсто.

Според НБРМ, вкупните кредити во август бележат минимално месечно зголемување од 0,2 отсто, при што кредитниот раст кај домаќинствата го надминува намаленото кредитирање на корпоративниот сектор. Кај домаќинствата има зголемување од 0,2 отсто, а кај корпоративниот сектор има намалување од 0,2 проценти.

Годишниот кредитен раст кој изнесува 5,1 отсто во најголем дел, односно 89 отсто произлегува од растот на кредитите одобрени кај домаќинствата. Кај вкупните кредити на домаќинствата е евидентиран годишен раст од 10 отсто.

Кредитите на корпоративниот сектор, како и минатиот месец бележат надолна месечна промена од 0,2 проценти, главно детерминирано од денарската компонента. На годишна основа, пак, состојбата на кредитите одобрени на претпријатијата е зголемена за еден отсто при раст на денарското кредитирање, наспроти годишниот пад кај девизното кредитирање.

Во текот на август кај кредитите одобрени на картички забележале месечен раст од 0,4 отсто, додека на годишно ниво има намалување од 0,7 проценти. Кај негативните салда на тековните сметки овој месец е регистриран месечен раст од 1,3, а годишен од 2,9 отсто, додека кредитите одобрени врз други основи бележат месечно намалуваање од 0,4 отсто при годишен раст од 1,7 проценти.

Депозитите на домаќинствата, во август регистрираат месечен раст од 0,6 отсто, што во најголем дел е предизвикан од растот на депозитите во странска валута. На годишна основа, депозитите на домаќинствата бележат зголемување од 5,7 отсто при раст и на денарските и на девизните депозити со позначителен придонес на депозитите примени во денари имаат придонес кон растот од 58,1 отсто.

(М.Б.)