Македонија ќе се поврзе енергетски со Бугарија, а и влог во Белене е опција

Добивај вести на Viber

Бугарски НЕК „Белене“ објави официјална покана до потенцијални инвеститори да вложат во нуклеарката. Огласот треба да заврши во почетокот на 2020 година, а најраниот датум за пуштање на централата е 2030 година. На овој повик можно е да учествува и Македонија, а за тоа најава имаше и вицепремиерот за економски прашања Кочо Анѓушев. Тој во интервју за Фактор на почеткот на годинава рече дека се размислува македонската Влада да закупи дел од бугарската нуклеарна централа „Белене“ и на тој начин долгорочно да ги осигура снабдувањето и конкурентноста на пазарот на електрична енергија.

„Во енергетиката не може да има прогрес без да се има долгорочна стратегија. Ние во моментов ја немаме, ама се изработува. Увозно сме зависни енергетски, а дома произведуваме само електрична енергија. Немаме нафта, гас, а немаме ни јаглен во бесконечни количини. ЕЛЕМ на времето призведувал седум тераватчасови електрична енергија сега произведува 4,2 терватичасови на годишно ниво. За Македонија најлогично беше да се поврзе со Бугарија. Откако ќе направиме „каплинг“, Македонија ќе има поевтина енергија и тоа ќе биде добро за сите компании. Би било паметно и да си закупиме ресурс. Тука го гледам „Белене“, нуклеарната централа како опција.  Ако најдеме сила можеме да станеме и сопственици на тој дел. Со „каплингот“ тоа нема да биде ни проблем - рече Анѓушев.

Бугарската влада во моментов го мотивира рестартирањето на проектот за нуклеарна централа Белене и бара надворешни инвеститори.

Инаку, пред осум години бугарскиот министер за економија му понуди на тогашниот вицепремиер за економски прашања Владимир Пешевски, Македонија да се вклучи во изградбата на Белене. Тогаш Пешевски рече дека Македонија ќе ја анализира можноста за инвестирање во Бугарија и истото на тоа заврши. Вицепремиерот тогаш посочи дека треба да се направи детална и опсежна анализа пред државата да одлучи дали ќе инвестира во нуклеарната централа Белене во Бугарија, дали ќе гради сопствена нуклеарка на македонска територија или воопшто нема да се потпира на нуклеарна енергија. 

А.Т.