Макрон ќе овозможи старт на преговори, но има и услов
Објавено во: Македонија 15 Февруари, 2020
Францускиот претседател Емануел Макрон изјави дека ќе им овозможи на Северна Македонија и на Албанија да ги почнат разговорите за пристапување во Европската унија доколку следниот месец извештаите на Европската комисија за двете земји бидат позитивни, јави Ројтерс.
Макрон ова го изјави на 56. Минхенска безбедносна конференција, со што навестува дека ќе го одмрзне напредокот на двете балкански земји кон членството во ЕУ и ќе ги увери другите европски лидери дека Франција сè уште го поддржува проширувањето на ЕУ.
„Го чекаме извештајот (на Европската комисија) во март… во зависност од тоа, ако резултатите се позитивни и ако се воспостави доверба, тогаш треба да бидеме во позиција да ги започнеме преговорите“, рече Макрон на конференцијата.
Тој вели дека процесот мора да биде јасен и реверзибилен.
Наведе дека ако сакаат да го интегираат Западен Балкан во ЕУ, мора да се вложува во инфраструктура, култура, јазик. Макрон вели дека земјите од Западен Балан ќе бидат дел од ЕУ, но само ако ги исполнат условите, и тоа мора јасно да се каже.
Макрон одби да го одобри почетокот на пристапните преговори на самитот на ЕУ во октомври, наведувајќи дека процесот за прием на нови членки треба да се промени.