МАРТ ЌЕ БИДЕ ЕДЕН НАВИСТИНА ТЕЖОК МЕСЕЦ - државата на домашните кредитори треба да им врати 112 милиони евра
Објавено во: Финансии 16 Февруари, 2024
Претстојниот март ќе биде еден од потешките месеци за враќање пари од државата кон домашните кредитори.
Календарот на Министерството за финансии покажува дека државата во третиот месец од годинава треба по основ на претходно направени задолжувања на домашниот пазар да врати вкупно 112 милиони евра, што е засега најмногу во однос на сите други месеци за кои се обзнанети финансиските планови на власта во државава.
Па така, уште на први март треба да се вратат 68,1 милиони евра и тоа по основ на државни хартии од вредност што се издадени минатата година.
Потоа, на седми март треба да се направат две исплати на суми од 16,3 и 9,8 милиони евра, за државни обврзници кои се издадени во 2019 година, и на 27 март ќе треба да се вратат 17,8 милиони евра, за државни хартии од вредност кои биле издадени во минатата година.
Но, за да ги врати овие пари кон домашните банки и фондови државата нема да остане „на цедило“, бидејќи таа си има веќе закажано аукции на кои ќе си позајми повторно средства од домашниот пазар, и ќе биде доволно ликвидна да се раздолжи по основ на стари долгови.
Инаку, во февруари, односно овој месец, државата вкупно враќа 62,4 милиони евра, додека, пак, во јануари вратената сума била на ниво од 56,6 милиони евра.
Н.Н.Ф.