Мартенс со барање до македонската Влада: На германските инвеститори им треба предвидлива криза

Добивај вести на Viber

Партик Мартенс, претседателот на Делегацијата на германското стопанство, кое ги застапува германските инвеститори во Македонија, ја повика Владата да „ја направи попредвидлива епидемијата за нив за да може тие да ги направат и спроведат своите инвестициски планови“.

Претставникот на германската стопанска комора ова го кажа по состанокот со министерот за економија Крешник Бектеши, каде што Мартенс се информираше дали државата планира дсо автономен пакет на економски мерки да ги поддржи странските инвеститори од автомобилската индустрија.

- На денешната средба зборувавме за сериозната состојба со германските инвеститори но и каква ќе биде соработката во иднина.За компаниите е најприоритетно сигурноста во планирањето и правната сигурност и точно да се знае како се одвиваат процедурите во одредени области во државата. Германските комапании во земјата како и во матичните во Германија поминуваа тежок период во кризата. Никој не е сигурен кога ќе заврши пандемијата, рече Мартенс.

На брифингот со новинарите, правејќи споредба, тој рече дека „Македонија и Германија, гледано процентуално во однос на буџетот, приближно еднакво се задолжуваат за да ја помогнат економијата преку пакет на мерки“.

- Треба корона кризата да биде предвидлива. Кога не знаеме како таа ќе се однесува, не може да се направи ниту добар план за инвестициите, изјави Мартенс кој имаше состанок со Бектеши на негово барање.

Министерот рече дека државата ќе донесе мерки кои ќе ги направат компаниите поконкурентни на внатрешниот и надворешниот пазар.

- Го информирав господинот Мартенс за четвртиот сет, кој е усвоен од Владата,сега чекаме усвојување на ребалансот, а тука е и акциониот план на Министерството за економија. За автономните мерки од автомобилистичката индустрија, нашиот закон за царини и тарифи не е целосно усогласен со царинските стапки на ЕУ. За тоа треба да се разгледа и економската оправданост и да се добие позитивно мислење од Министерството за финансии. Има германски компании кои во 2021 сакаат да ги удвојат своите капацитети во Северна Македонија, а за тоа ние до Владата ќе треба да поднесеме предлог-мерки за помош, порача Бектеши.