МАСОВНИТЕ СОБИРАЊА ПРИЧИНА ЗА ВИСОКИОТ БРОЈ НОВОЗАРАЗЕНИ: Нема веќе пејачи во кафулињата, Владата ги прифати новите рестрикции
Објавено во: Македонија 04 Октомври, 2020
Анализата на
епидемиолошките анкети која викендов ја правеше Комисијата за заразни болести покажала
дека сите масовни собирања при кои не се почитуваат протоколите за заштита и
спречување на ширењето на корона вирусот се главен фактор за високиот број на новоинфицирани
на дневна основа, посебно поради фактот што најмногу заразени се на возраст од
20 до 30 години и од 30 до 40 години.
Во оваа насока, Владата на вечерашнава седница ги прифатила предлозите на Комисијата за заразни болести за новирестиктивни мерки кои главно се однесуваат на локалите, рестораните, баровите, односно угостителските објекти.
Министерот за здравство Венко Филипче попладнево, веднаш по состанокот на Комисијата за заразни болести на Канал 5 прецизно појасни кои ќе бидат рестриктивните мерки.
-Прво, да се забрани гостување на пејачи и диџеи во сите угостителски објекти. Потсетуваме, дека дискотеките и ноќните клубови не добија дозвола за работа, инсистираме да се почитува работното време во угостителските објекти до 12 во работни денови, и 1 часот после полноќ за викенд. Се намалува дозволената гласност на музиката и се ограничува до 55 децибели согласно нашиот правилник на Министерството за здравство, со цел да се намали поголемата концентрација на луѓе на едно место. Препорачуваме и да се намали бројот на луѓе коишто може да седат на една маса во угостителските објект од сега дозволените 12 на 4. Го очекувавме ова, го најавувавме тој зголемен притисок, мини бран што требаше да се јави во есенските месеци заради поголемата концентрација на луѓе веќе после завршување на годишните одмори. Тоа значи дека повеќе нема да има гостување на пејачи и на диџеи во угостителските објекти. Потсетуваме повторно дека нема дозвола за работа, односно во ниту еден момент не добија дозвола дискотеките и ноќните клубови. Понатаму се намалува дозволената јачина на звукот на 55 db за да се одржи препорачаната дистанца и се намалува бројот на лица коишто седат на една маса од 12 на 4 лица, истакна министерот Филипче.
Од Владата соопштија денеска дека Пазарниот инспекторат, во текот на вчерашниот ден, спровел над 100 контроли низ целата држава. Притоа, кај 19 субјекти се изречени казни за непочитување на здравствените протоколи и други прекршоци.