Мејер: На Балканот постои извесна поддршка за некој вид промена на границите
Објавено во: Балкан 05 Јуни, 2017
Според американскиот експерт за Балканот, Стивен Мејер, промената на границите на Балканот на мирен начин е најдобро решение за проблемите во регионот.
Мејер во интервју за руската агенција Спутник, вели дека „во границите нема ништо свето“, додавајќи дека по завршувањето на Студената војна многу граници се промениле на мирен начин, како што беше случајот со поранешните Советски Сојуз или Чехословачка.
Додава дека на Балканот постои „извесна поддршка за некој вид промена на границите, но и страв“, па затоа во регионот мора да се создаде „креативно лидерство“.
Мејер објаснува дека идејата за Голема Албанија може да се реализира, исто како и прашањето за создавање Голема Србија или да се разгледа идејата за формирање „некаков вид конфедерација на православните подрачја“, во која би влегле Македонија, Црна Гора, Република Српска и Србија.
Според него, доколку дојде до формирање на Голема Албанија, Србија би можела како компензација да го добие делот од Косово северно од реката Ибар, а би требало и да се организира и референдум во Република Српска, за тамошните жители да кажат дали сакаат независност, дали сакаат да бидат дел од Босна и Херцеговина или да станат дел од Србија.
„На повеќето луѓе со кои разговарав (во Република Српска) им се допаѓа идејата да бидат дел од Србија. Мислам дека постои и можност за тесна соработка со православната Македонија. Суштината е во тоа што во овој дел на светот прашањето на суверенитетот не е решено“- вели Мејер во интервјуто.
Како што пренесува Танјуг, тој натаму им препорачува на балканските лидери „да ги држат настрана САД и генерално големите сили“.
Мејер вели дека на Балканот имало преголеми очекувања од политиката на американскиот претседател, Доналд Трамп.