Мицевски во одбрана на екс спикерот Вељаноски: Немало никаков план за насилство
Објавено во: Македонија 04 Септември, 2020
Поранешни и актуелни пратеници од ВМРО ДПМНЕ денеска сведочат, повикани од поранешниот собраниски спикер Трајко Вељаноски, обвинет во случајот за организирање на собраниските насилства од 27 април.
Прв сведочеше сегашниот координатор на пратеничката група Никола Мицевски.
„Ниту со сопартијците ниту пак во собранието меѓу пратениците, се разговарало за било каков план за да се спречи изборот на претседател на Собранието“, рече Мицевски.
Тој негираше и поврзаност на партијата со протестите на За заедничка Македонија.
„Никој од пратениците од ВМРО ДПМНЕ никогаш не зборувал за некаков план за насилство, ниту пак да се попречи работата на Собранието. Немам информација и дека некој од сега обвинетите во овој случај контактирал со водачите на движењето За заедничка Македонија“, рече Мицевски.
На прашање на обвинителката Гордана Смаќоска дали Вељаноски како тогашен претседавач со конститутивната собраниска седница можел да го исклучи микрофонот на пратеникот Зеќирија Ибраими кој ја пееше албанската химна, Мицевски одговори дека не можел и дека тоа се правело во комуникација со службите.
Дека не знаеле за план за упад во законодавниот дом и дека партијата не била поврзана со протестите одговорија и екс пратениците Крсто Јовановски, Драган Данев и Трајчо Димков. Одбраната тврди дека сведочењето на пратениците покажуваат дека обвинетиот Вељаноски го испочитувал собранискиот деловник.
Покрај Вељаноски, обвинети во случајот за организирање на 27 април, се и ексминистрите Миле Јанакиески и Спиро Ристовски, но и поранешниот директор УБК, Владимир Атанасовски. Се товарат за терористичко загрозување на уставниот поредок и безбедноста.