Христијан Мицкоски, претседател на ВМРО-ДПМНЕ денеска изјави дека економијата тоне, граѓаните осиромашуваат, БДП е речиси нула, a девизните резерви опаѓаат.
БДП вели во првите три квартали е некаде околу 0,4 проценти под нулата, што значи дека има негативен раст, а до крајот на година би биле среќни ако завршиме со нула, што претставува едно од најлошите достигнувања од осамостојувањето на Република Македонија па до денес.
„Во текот на денешниот ден ќе остварам средба со тројцата европратеници, господата Кукан, Вајгал и Флекенштајн. На средбата ќе стане збор за актуелната политичка ситуација во државата. Но, она што е поважно за граѓаните е лошата економска состојба на секој од нив поединечно, која е резултат на погрешните и лоши политики што Владата предводена од СДСМ ги практикува во Република Македонија“- вели Мицкоски.
Додава дека градежништвото е во опаѓање околу 11 проценти, индустриското производство се движи некаде под нулата, околу 4 проценти.
Втор параметар, според Мицкоски се странските директни инвестиции.
„Ќе бидеме среќни ако 2017 година ја завршиме со 100 милиони евра помалку директни странски инвестиции во споредба со она што било случај на крајот од 2016 година. 100 милиони евра помалку директни странски вложувања во споредба со она што било во 2016 година. Третиот параметар, исто така катастрофален, што сакам да го споменам, е намалувањето на државните бруто-девизни резерви. Имено, во 2017 година домашните бруто-девизни резерви се намалени цели 266 милиони евра, што е некаде приближно 11 проценти помалку во споредба со она што било ситуација на 31 декември во 2016 година“ вели Мицкоски.
Лидерот на ВМРО-ДПМНЕ вели дека граѓаните во Република Македонија се 11 проценти посиромашни на 31 декември 2017 година во споредба со 31 декември 2016 година.
