Мицкоски: Нема Македонец кој не се засрами од Заев, се гледаме на улиците
Објавено во: Македонија 26 Ноември, 2020
Опозициската партија ВМРО - ДПМНЕ за денеска во 18 часот организира протест на кој како што рекоа „се бранат црвените линии кои се последниот бедем на нашиот идентитет“. Треба да биде натпартиски и предупредувачки протест, а лидерот на партијата Христијан Мицкоски со нова објава повторно ги повика граѓаните на улица.
„Нема Македонец кој не почувствува срам од интервјуто, каде Заев со насмевка и скрстени раце кажуваше невистини за својот народ. Ако Заев ги прогласи окупаторите за ослободители, тогаш македонските антифашисти - Партизаните кои се вистинските ослободители, Заев ги прави окупатори, а бидејќи врз антифашистичката и Народноослободителната борба како и Илинденската борба се темели на македонската државност, тогаш испаѓа дека Заев ја укинува и македонската државност, вели Мицкоски.
Додава дека ова не било наивно и вели дека се наоѓаме во историски моменти во кои како што напишал или ќе покажеме дека заслужуваме држава или ќе нѐ нема.
„Затоа протест сега, за да не биде предоцна! Заштите се, носете маска, држете растојание. Се гледаме на улиците, напишал Мицкоски.