Милков му одговори на Пендаровски: Не станува збор за мешање на Бугарија во внатрешните процеси на Maкедонија
Објавено во: Македонија 06 Април, 2023
Бугарија не прифаќа формулација со која Бугарите би имале различен статус од другите народи во Македонија.
Ставот го изнесе бугарскиот шеф на дипломатијата, Николај Милков, откако претседателот Стево Пендаровски го нарече скандалозно барањето Бугарија да биде дел од процесот на уставни измени.
„Не станува збор за мешање на Бугарија во внатрешните процеси на нашата соседна земја. На крајот на краиштата, ние први ја признавме како независна земја. Станува збор за создавање атмосфера на доверба преку конструктивна комуникација, доколку се оцени дека таква е возможна. Но, според нашата проценка, тоа е крајно задоцнето и крајно неопходно – за да можеме да се движиме кон полноправни добрососедски односи. Македонските Бугари мора конечно да добијат еднаквост во секој поглед и во Уставот и подоцна во рамките на законите“, рече Милков.
Пендаровски претходно изјави дека во 21 век апсурдно е да барате да се мешате во внатрешните политички и во уставно-правни процеси на која било држава, а тоа не го прават ниту окупаторите кон земјите, териториите или државите што ги окупираат.По ВМРО-ДПМНЕ и Левица одлучи да не учествува во работната група на министерството за правда за уставните измени. Од партијата на Димитар Апасиев обвинуваат за тајни средби меѓу лидерите на ВМРО-ДПМНЕ и на СДСМ и тоа во посредство на бугарски служби.
Без внесување на Бугарите во Уставот, Македонија не може да ги продолжи преговорите со Европската Унија(ЕУ). ВМРО-ДПМНЕ предложи уставни измени по хрватски модел, но премиерот Димитар Ковачевски вели дека имаме и свој македонски модел.