Министерот Хоџа не смеел да ја постави сопругата за управител на неговиот рибник

Добивај вести на Viber

Премиерот Зоран Заев денеска пред медиумите рече дека Аријанит Хоџа, министерот за земјоделие, шумарство и водостопанство не смеел да постави член на потесното семејство како управител на неговата компанија и дека тоа треба да го коригира со друго име назначено за управител.

Државната комисија за спречување корупција отвори предмет за судир на интереси кај Хоџа бидејќи личниот бизнис по добивањето функцијата министер го префрлил на сопругата. 

„Фактор“ уште лани напиша дека Хоџа за да биде министер за земјоделство, шумарство и водостопанство се избришал како сопственик и управител на Фреш Фиш, компанијата од гостиварското село Вруток која  е еден од најголемите производители на риба во Македонија. Како одговорно лице е запишана неговата сопруга Мимоза Хоџа на местото на единствениот министер во новата Влада кој доаѓа од редовите на Беса.

За рибникот на генералниот секретар на Беса е познато дека произведува и тргува со 120 тони риба, главно наменети за рестораните низ земјата и странство. Фреш Фиш има седум вработени.

Последната инвестиција од 22.000 евра била наменета за проширување на базените, производството и за набавка на класификатор на риба и храна за риби. Дел од сретствата Фреш Фиш ги обезбедил преку кредитната линија на Македонската развојна фондација за претпријатија. Во плановите на компанијата биле и преработка на рибата и транспорт на жива риба до клиентите.

Во селото каде што извира Вардар и кое активно развива еко-туризам има голем број рибници кои годишно произведуваат над 200 тони калифорниска пастрмка. Голем дел од произведената риба се подготвува во познатите ресторaни во самото село кои имаат гости во текот на целата година.

Хоџа во својата официјална владина биографија, која патем е најкратка од сите други членови на Владата, навел дека е основач и управител на приватна компанија од 2009.