Миновски: Да продолжи даночната политика на ниски даноци
Објавено во: Економија 14 Октомври, 2016
Во интерес на Република Македонија е да продолжи примената на постоечката даночна политика на ниски даноци, изјави министерот за финансии, Кирил Миновски на денешната кафе дебата организирана од Европското движење на Македонија.
Вели дека Македонија, како држава која се бори да ги привлече инвеститорите, но и да го стимулира растот на домашните компании, од посебно значење е да ја одржи оваа ставка на ниско даночно оптоварување, смета тој. Додава дека ова обезбедува директен поттик на претприемачите и на инвеститорите.
„Ние не знаеме кога точно Македонија ќе стане членка на Европската унија иако работиме континуирано на тие стандарди. Меѓутоа, овие политики коишто ги спроведуваме се во насока токму на поттикнување на развојот на домашната економија. Затоа што единствено преку одржлив приватен сектор можеме да ги исполниме стандардите за членство во ЕУ и да го издржиме како компании конкурентскиот притисок којшто го има единствениот европски пазар“ - кажа Миновски.
Објасни дека европскиот заеднички пазар бара од нашите компании да се соочат со конкурентскиот притисок од тој заеднички пазар, а тоа значи дека треба да имаме одржливи и силни компании коишто навистина ќе имаат конкурентни производи и во таа насока и фискална политика.