МИОА реагира за коментирањето на ревизорскиот извештај

Добивај вести на Viber

Од  Министерството за информатичко општество  реагираат за текстот „Како се трошеле пари од кредитните картички во министерството за информатичко општество?",во кој се коментира ревизорскиот извештај на Министерството за информатичко општество и администрација. 

„Имено, содржината во која се дадени извадоци од ревизорскиот извештај, што е коректно, не кореспондира со насловот на текстот. Се работи за следното - МИОА располага со една сметка во НЛБ - банка за која издадени се три поеднични картички на министерот, заменик министерот и државниот секретар. Картичките се со посебни броеви по кои се разликуваат, со што се овозможува аналитичка евиденција за секоја трансакција која е направена за секоја посебна картичка. Секој трошок задолжително се покрива со соодветен сметководствен документ (фискална сметка, фактура). Констатацијата која ја има дадено државниот ревизор, не наведува на неправилно работење, туку на недоследност на софтверската евиденција. Имено, аналитичката евиденција за кредитната картичка во целиот период на постоење на министерството, вклучително и 2015 година која беше предмет на ревизија, се правела во Ексел табели, бидејќи стариот сметководствен софтвер кој го користела Службата за општи и заеднички работи на Владата на РМ (која служба го води сметководството на МИОА) не ја овозможувал бараната аналитичка евиденција по лица, туку како еден коминтент - банката“ - стои во реакцијата од Министерството. 

Состојбата е надмината со набавка на ново софтверско решение со кое е овозможена аналитичка евиденција за секоја направена трансакција, поединечно по корисник, додаваат оттаму.