МНР даде детали за што разговарале Османи и Захариева

Добивај вести на Viber

Oд Министерството за надворешни работи дадоа детали за тоа на кои теми разговарале денеска во Софија македонскиот шеф на дипломатијата Бујар Османи и бугарската министерка за надворешни работи, Екатерина Захариева. 

Акцискиот план за меѓусебна соработка и подготовките за одржување на состанокот на меѓувладината комисија биле меѓу главните теми за разговор на состанокот на министерот за надворешни работи, Бујар Османи со неговата бугарска колешка Екатерина Захариева во Софија.

„На враќање од посетата на Париз, застанав во Софија и се сретнав со министерката за надворешни работи Екатерина Захариева, со која разговаравме за секторска соработка и подготовките за одржување на состанокот на меѓувладината комисија како инструмент кој произлегува од договор за добрососедство веднаш по усогласување на акцискиот план за секторска соработка“, напиша Османи на својот профил на Фејсбук.

МНР соопшти дека на средбата Османи – Захариева биле разгледани и прашањата поврзани со ковид-кризата и начините на кои двете земји остваруваат соработка во справувањето со овие предизивици.

„Во оваа прилика Захариева потврди дека се прават напори за изнаоѓање начин за испорака на ветените вакцини за Република Северна Македонија“, стои во соопштението.

Во соопштението на МНР се додава дека во продолжение на средбата било разговарано за Акцискиот план за меѓусебна соработка и можноста за неговата финализација, во функција на евентуално договарање на втората меѓувладина конференција меѓу двете влади, чии копретседавачи се токму министрите Османи и Захариева.

„Соговорниците изразија задоволство од досегашната соработка и приликата ја искористија и за размена на мислења и за други теми од заеднички интерес за двете страни“, се додава во соопштението.