На кое дереџе падна „Сковин“? По 5 „банки“ (денари) за акција!

Добивај вести на Viber

Нов историски рекорд во аналите на Македонска берза. Акцијата на поранешната винарија „Сковин“ во која најголем акционер е „Фершпед“ вчера прокнижи пад на цената од 99 отсто. Беа продадени 11.000 акции по цена од (пет банки н.з.) односно 5 денари за акција

Акцијата на позната скопска винарија „Сковин“ регистрираше историски (но за жал „црн“ рекорд н.з.) на Македонската берза за хартии од вредност. Акцијата на „Сковин“ вчера се тргуваше по цена од 5 денари што претставува пад од 99 отсто во однос на последната пазарна цена на таа хартија од вредност. За 11.000 акции односно 1 отсто од сите акции на таа компанија денеска некој зема, а друг плати само 55.000 денари. Ако се суди по вчерашната цена на таа акција вчера „Сковин“ вредел вкупно 5,5 милиони денари што е помалку од 100.000 евра. Со оглед на тоа дека „Сковин“ има вкупно 359 акционери од кои „Фершпед“ е убедливо најголем и има 96,7 отсто од акциите со право на глас, логично е дека таа компанија е купувач и на овие 11.000 акции за 55.000 денари. Досега нема официјална информација за тоа кој продава, а кој купува. Доколку има „Фактор“ ќе ја сподели со своите читатели.

Последната трансакција со таа акција е регистрирана на 29 ноември 2018 година. Тогаш цената за една акција била 500 денари, а била истргувана само една акција.

Што е всушност „Сковин“?

Да потсетиме дека оваа компанија во која од четири члена на Одборот на директори два се синовите на Штерјо Наков : Драган и Сашо зимоска одлучи и го продаде имотот со кој располага „Сковин“ и трговските марки за вкупно 3,35 милиони евра. Како понудувачи се јавија два правни субјекти. Првиот е домашната компанија „Сковин винарија ДООЕЛ“ која е заинтересирана за купување на движен и недвижен имот од „Сковин“ и сингапурска компанија SIAK PTE. LTD која е заинтересирана за купување на трговските марки на скопскиот производител на вино. 

Предлогот членовите на Одборот на директори го дадоа заради тоа што (цитираме) : понатамошното работење на Друштвото ќе продуцира дополнителни загуби кои го ставаат Друштвото во позиција на негативно работење и неможност да се измируваат обврските спрема доверителите . Во интерес на Друштвото односно на акционерите е да се изврши купопродажба на целокупниот имот на Друштвото со што би се обезбедиле средства за покривање на обврските спрема доверителите.

„Сковин “ во последните три години (од 2017 до 2019 година) бележи пад на приходите од дејноста. Лани компанијата завршила со загуба од 2 милиони евра. Повеќе информации за крвната слика на „Сковин“ на следниот линк Податоци за издавачот - Сковин АД Скопје.

Р.Ф.