На Косово не му се допаѓа иницијативата „Отворен Балкан“, била без визија
Објавено во: Балкан 29 Јули, 2021
Косово не ја поддржува иницијативата „Отворен Балкан“.
Владата во Приштина информираше дека не ја поддржува иницијативата за „Отворен Балкан“, иницирана од премиерите на Македонија и Албанија, Зоран Заев и Еди Рама и претседателот на Србија, Александар Вучиќ. Во писмена изјава до медиумите на групацијата „Коха“ се наведува дека иницијативата е „без визија за регионот“. Од кабинетот на косовскиот премиер Албин Курти велат дека не биле поканети на денешниот Регионален форум поради противењето на иницијативата која потекна од средбата на Заев, Рама и Вучиќ во октомври 2019 година во српскиот град Нови Сад.
„Нашите ставови за идејата од Нови Сад, таканаречениот „Мини-Шенген“, веќе се познати. Новосадската иницијатива нема одобрување од наша страна и следствено ние немавме официјална покана за учество на средбата. За нас таканаречениот „Мини-Шенген“ е иницијатива без визија за регионот. Ние предложивме унапредување на регионалната соработка од ЦЕФТА во СЕФТА, според моделот на ЕФТА-ЕЕА, од што истовремено би имале придобивки сите земји на Западен Балкан“, се вели во одговорот.
Иницијативата „Отворен Балкан“ е слободна и отворена за сите, таа не е ексклузивна туку инклузивна, рече премиерот на Албанија Еди Рама на денешниот Економски форум во Скопје. Премиерот Зоран Заев ја повика и Бугарија доколку сака да биде дел од од „Отворен Балкан“.