НЕМА ДА ИМА НИ КОНЦЕРТИ НИ ПОЗНАТИ ИМИЊА - ќе има само симболична поворка на Вевчанскиот карневал
Објавено во: Македонија 27 Декември, 2020
Коронаврусот го одложи Вевчанскиот карневал, кој традиционално се одржува за Стара Нова година.
Градоначалникот Сашо Јанкоски рече дека оваа година тој ќе се одбележи со симболична поворка, без концерти и друга организација.
Откажувањето на фестивалскиот дел, како што рече, е за да се спречи масовно собирање на луѓето, но и нагласи дека василичарските поворки ги организираат двете друштва, Горно и Долно маало.
„Општина Вевчани се откажува од организирање концертите на 12 и 13 јануари за да се спречи масовно собирање поради пандемијата со ковид-19. Но, ниту некогаш се мешала, ниту има право да се меша, а најмалку да ја одлага Свети Василија. Организацијата на поворките со Василичари е на василичарските друштва Горно и Долно мало и тоа е нивно право, но и обврска“, изјави Јанкоски кој апелираше да се почитуваат мерките за заштита.
Вевчанскиот карневал е со традиција од околу 15 века. Вевчанци преку целата година ги подготвуваат маските, а покрај карневалското дефиле, изминатите години се организираа концерти со познати музички имиња.