Нема надеж за весникот „Независен“

Добивај вести на Viber

Нема надеж за весникот „Независен“. Според сознанијата на Фактор, на вработените им било соопштено дека весникот и утре нема да се печати. 

Сепак, кажано им било дека до крајот на оваа недела треба да доаѓаат на своите работни места.

А во меѓувреме, сеуште функционира веб сајтот на весникот, на кој се пласираат информации. 

Инаку, главниот проблем заради кој весникот не може да се печати е долг кон печатницата, но според сознанијата на Фактор, не станува збор за некоја голема сума. 

Дали може да се најде инвеститор од земјава кој би го финансирал весникот со цел тој да продолжи да излегува, нашите извори велат дека засега нема такви изгледи

Најавата за згаснување на весникот „Независен“ Самостојниот синдикат на новинари и медиумски работници ја смета за уште еден удар како врз медиумските работници во Македонија, така и врз целокупниот медиумски пазар на труд.

ССНМ по потврдата од менаџментот дека весникот „Независен“ утре нема да излезе, со жалење констатира дека тоа значи останување без работа на повеќе од 20 новинари и медиумски работници, со што уште повеќе се продлабочува и онака лошата социјално-економска состојба на новинарите во Македонија. Останувањето на новинари и медиумски работници без работа значи потрес за медиумскиот сектор во земјава каде се зголемува понудата на работна сила, а се намалува побарувачката што за новинарите значи помала сигурност и поголем притисок.

Затворањето на „Независен“ покажува и колку е кревок овој сектор и условите во кои работата новинарите и медиумските работници, во секојдневен страв за своите работни места.

Весникот Независен речиси две години постоеше на медиумската сцена во земјава, Тој е во сопственост на странски, конкретно грчки инвеститор. 

Фактор разговараше со еден од новинарите во Независен.

„После затворањето на три дневни весници во земјава, Утрински весник, Дневник и Вест, од политички причини, и со заминувањето на претходната Влада на ВМРО-ДПМНЕ, ова беше прв обид да се воспостави нов дневен весник во земјава, кој беше странска инвестиција, и формиран брз професионални основи, со искусни, но и со млади новинари. Се обидовме да ги вратиме принципите на новинарството и професионализмот и да придонесеме за развој на професионално, објективно и квалитетно новинарство, на овој новинарски пазар кој очигледно беше руинирам во последните 10 години. Очигледно е дека не може да пробие нов медиум врз основа на квалитет, професионалност, и во кој полесно пробива пропагандата, дезинформациите и лажните вести, отколку ангажирано, аналитичко и квалитетно новинарство“, вели еден од новинарите за Фактор. 

Инаку, новинарите во Независен се досега редовно ги земаа своите плати, се надеваат дека ќе успеат да ја добијат и октомвриската.

Повеќе новинари на социјалните мрежи веќе изразуваат жалење зошто од медиумската сцена во земјава згаснува еден од најпрофесионалните медиуми.