Нова финансиска помош за Кипар

Добивај вести на Viber

Управниот совет на Европскиот стабилизациски механизам донесе одлука за давање финансиска помош на Кипар, пренесоа руските медиуми. Во согласност со одлуката на Еврогрупата од 25 март европските партнери на Кипар ќе му доделат девет милијарди евра, а ММФ уште една милијарда евра, се наведува во соопштението на ЕСМ, цитирано од кипарските медиуми. Претседателот на ЕСМ, Клаус Реглинг, подвлече дека доделувањето на помошта е првата комплетна програма за макроекономска стабилизација, што се финансира од Европскиот стабилизациски фонд. ЕСМ досега единствено и имаше помогнато на Шпанија и тоа со 41 милијарда евра за реформа на финансискиот сектор. Првата транша од помошта за Кипар се очекува во средината на мај. Овие средства ќе ги покријат буџетските потреби на земјата и ќе и помогнат да ги намири своите среднорочни и долгорочни долгови. Средствата ќе бидат употребени и за рекапитализација на кредитните друштва на земјата, со исклучок на „Банката на Кипар“, која според условите на спогодбата за доделување на помошта, треба да го пополни својот капитал преку оданочување на негарантираните влогови.