Нови телевизии никнуваат како печурки, ќе се подобри ли квалитетот на програмата?

Добивај вести на Viber

Почна да зрачи ТВ Нова, трета по ред телевизија на македонското медиумско небо што се отвора во период од неколку месеци. Но не е последна. Според досегашните информации во медиумите, наскоро ќе се отвора уште една телевизија. Пред ТВ Нова, пак се отворија „Шења“ и „21“. Инаку, Билјана Василова Трендафиловска застанува на чело на новиот  проект “Телевизија Нова“. Со неа во тимот се и Љубиша Николовски, Гоце Михајловски, Анита Петровска. Се работи за нов телевизиски проект зад кој стои бизнисменот и сопственик на компанијата “Трансмет“, Сеад Кочан. Најавуваат ли промените во медиумскиот бизнис прегрупирања и на политичката сцена? Во два од трите весници кои се дел од компанијата МПМ пред неколку недели имаше разрешувања и именувања во врвот на уредништвото. Смени на уредниците се случија во ВЕСТ и УТРИНСКИ. Промени ќе има и во врвот на јавниот сервис МРТ. Си заминаа одговорниот уредник Петрески и уредничката Трендафиловска. Дали овие поместувања во МРТ најавуваат создавање на терен за спроведување на политичкиот договор од Пржино поврзан со реформите во медиумите. На истекот од ланската година во медиумскиот бизнис  започнаа трансфери на новинари од една во друга телевизија. Иако се најавуваа продажби или трансфери и во дел од останатите национални телевизии, тоа засега не се случи. Неодамнешното истражување на МИМ покажа исклучителна недоверба на гледачите во вестите на телевизиските медиуми, што доаѓа како резултат на неквалитетните и пристрасни вести, како да се работи за партиски телевизии, а не за национални медиуми. Дали отворањето на нови телевизии може да ја промени сликата, останува да се види, особено што и програмски, телевизиите останаат заробени во турски серии, евтини сапуници и риалити шоуа и програма без никаква вредност.