Обвинителство со детали за смртта на осумгодишното дете од Неготино: Кобен ден за градот
Објавено во: Македонија 25 Ноември, 2020
Жителите на Неготино се во шок по големата трагедија што се случи вчера кога осумгодишно дете почина по пад од ѕид. Првично, полицијата објави дека околу 13.30 часот дете без знаци на живот било донесено во болницата во Неготино, каде била констатирана смрт. Денеска од обвинителство соопштија дека според сознанијата добиени на лице место, осумгодишното дете по завршување на училишниот ден, било оставено на чување кај роднини.
Заедно со уште четири други деца седеле на ѕид со висина од околу 70 сантиметри на еден од дворовите и разговарале. Во близина биле и неколкумина возрасни.
„Во еден момент детето се пожалило дека му е лошо, по што паднало од ѕидот. Возрасните го пренеле во болница, каде и покрај обидите за реанимација била констатирана смрт. Од извршениот увид на лице место и разговорите со сите сведоци на настанот, не произлезе никакво сомнение дека смртта е резултат на кривично дело. Родителите на детето исто така во разговор со јавниот обвинител изјавиле дека не се сомневаат оти причината за смрт би можела да биде кривично дело, велат од Службата за односи со јавноста при Републичкото јавно обвинителство.