ОДОБРЕНА НАБАВКАТА НА РЕМДЕСИВИР: Од буџетот се одвоени 1.300.000 евра за лекот кој ќе се користи во терапијата на болните од Ковид-19
Објавено во: Македонија 28 Октомври, 2020
Владата на
вчерашната седница го задолжи министерот за здравство, Венко да го потпише и
имплементира Посебниот договор за јавна набавка на лекот Veklury, односно Ремдесивир
согласно обврските преземени од Рамковниот договор за јавна набавка на лекот,
доделен со постапка за набавка преку Договорот за заеднички набавки склучен со
Европската комисија, информираат од владината прес-служба.
-Владата го задолжи Министерството за финансии да обезбеди во рамките на буџетот на Министерството за здравство за 2020 година, дополнителни 13 500 000 денари, за плаќање на лекот „Веклри (ремдесивир)“ за месец октомври, додека останатите средства во износ од 67 500 000 денари, за исплата по сукцесивна испорака на овој лек за период од 5 месеци, да се предвидат и обезбедат во буџетот на Министерството за здравство за 2021 година, е наведено во соопштението од Владата.
Набавката на овој лек е овозможена преку Европската Унија со потпишување рамковен договор меѓу Европската комисија и фармацевтската компанија „Гилијад“. Со овој договор, како што беше и претходно соопштено, ќе обезбедат 500 илјади дози, а ќе има можност и за зголемување на количините.
Заедничкиот договор за набавка е потпишан од 36 земји, вклучувајќи ги земјите од Европската Унија, Норвешка и Исланд, Обединетото Кралство и шест земји сегашни и потенцијални ЕУ кандидати, во кои освен С Македонија, директна набавка на лекот можат да направат и Албанија, Србија, Црна Гора, Босна и Херцеговина и Косово.