ОЈО со истрага во НЛБ: На мета директори и поранешен министер
Објавено во: Економија 15 Мај, 2017
Нов скандал ја тресе НЛБ банка.
Скопското обвинителство информира дека е покрената истрага за организиран криминал со перење пари.
Како што стои во соопштението ОЈО оформи предмет против поранешен и актуелен директор на НЛБ Тутунска Банка, поранешен министер, адвокат, нотар и други лица, како и едно лице државјанин на Република Словенија . Кривичните дела за кои ќе се гонат овие лица се Злоупотреба на службена положба и овластување од член 353 и Перење пари од член 273 од Кривичниот законик.
„Постојат сомненија дека во периодот од 2006 до 2017 година биле преземани дејствија за основање на фирми, подигање на кредити и пренесување на парични средства во Словенија и во австриски фирми, а потоа дел од средствата се инвестирани во основање на нови фирми и купување на недвижен имот на подрачјето на град Битола“, велат од ОЈО.
Со цел да утврди факти и да обезбеди докази, обвинителството во соработка со Министерството за внатрешни работи издаде наредби за анализа на финансиски трансакции и обезбедување на целокупниот доказен материјал од имотна, финансиска и управна природа.