Опозицијата не го признава кварталниот раст од 3,1 отсто, СДСМ возврати
Објавено во: Економија 07 Септември, 2018
ВМРО-ДПМНЕ смета дека статистичкиот економски раст на Бруто домашниот производ не се чувствува во стандардот на живеење, додека СДСМ возврати дека економијата расте поради напредокот на Македонија кон членство во евро-атлантските структури. Заводот за статистика вчера објави дека кварталниот раст април-,мај-јуни бележи напредок од 3,1 отсто, за разлика од првиот кој беше само 0,1 отсто, со што е направена консолидација за кратко време во планираната проекција.
Економијата повеќе од 15 месеци тоне. Нема реален напредок, а граѓаните се се посиромашни. Единствена светла точка се странските инвестиции, кои дојдоа во државата и отворија голем број на работни места благодарение на добрите политики на ВМРО-ДПМНЕ, соопштуваат од ВМРО-ДПМНЕ.
Од партијата нагласуваат дека странските инвестиции се моторот на економијата и фактор кој продуцира додадена вредност.
-Сите други сектори тонат поради неодговорните политики на власта. Власта го гуши реланиот сектор, наместо поддршка за домашните компании кои произведуваат и се извозно ориентирани гледаме како владата преку Фондот за иновации дели грантови на партиски функционери, дели милионски тендери на ново формирани фирми и дава лиценци за спроведување возачки испити на фирми без ден работни искуство во областа, се наведува во партиското соопштение.
Компаниите, посочуваат од ВМРО-ДПМНЕ, се понижени и немаат простор за работа, а граѓаните се соочуваат со реално намален стандард. Стоките и услугите се поскапи, а платите не само што не се зголемуваат туку и се намалуваат.
-Градежништвото е во застој, а процентот на реализација на капитални инвестиции од почетокот на годината заклучно со месец јули изнесува само 21.33%, што е историско најниско ниво и е показател на целосна неспособност на извршната власт. Република Македонија во изминативе 15 месеци доживува само порази. Оваа агонија не смее да продолжи. СДСМ мора да си замине. Државата мора да тргне напред, стои во партиското соопштение.
Растот на домашниот бруто-производ БДП од 3,1 отсто во вториот квартал ја потврдува успешноста на владините економски политики и позитивното влијание на интеграциите во ЕУ и НАТО, се вели во соопштението на СДСМ.
Од таму додаваат дека „придвижувањето на процесот на интеграција на Македонија во ЕУ и НАТО позитивно влијае врз економијата.“
„Таквиот процес дополнително ќе се интензивира по влезот во НАТО и по започнување на пристапните преговори за членство во ЕУ. Со влезот во ЕУ, Македонија станува дел од пазар од 500 милиони потрошувачи, македонската економија станува поконкурентна, се отвораат можности за повеќе инвестиции, нови работни места и засилен економски раст.Имајќи предвид дека во последниот квартал од владеењето на ВМРО-ДПМНЕ во 2017 економијата бележеше пад од 1,3 отсто, за нешто повеќе од една година, Владата предводена од СДСМ со успешните економски политики успеа да ја стабилизира економијата и да ја придвижи во вистински правец“, се додава во соопштението.
Од ВМРО-ДПМНЕ пак велат дека економијата повеќе од 15 месеци тоне, нема реален напредок, а граѓаните се се посиромашни.
„Единствена светла точка се странските инвестиции, кои дојдоа во државата и отворија голем број на работни места благодарение на добрите политики на ВМРО-ДПМНЕ“, велат од таму.