Поднесена интерпелација за Тошковски

Добивај вести на Viber

Пратеничката група на Левица денес поднесе Интерпелација за работата на министерот за внатрешни работи, Панче Тошковски за пожарот во дискотеката „Пулс“ во Кочани.

- Од позиција на министер, Тошковски грубо ја занемари и несоодветно ја извршуваше својата јавна функција, постапувајќи нестручно, неодговорно и непрофесионално што се оделотвори во низа противзаконски дејствија, скандали и кадрови промашувања во МВР - рече пратеникот Сашко Јанчев.

Од Левица, на прес - конференцијата  образложија дека интерпелацијата е базирана на десет основи од кои пет се директно поврзани со трагичниот настан во Кочани.

- Не слушнавме дека во истрагата е вклучена инспекторката за економски криминал на ОВР Кочани, која имајќи ги предвид нерегуларностите на работењето на дискотеката не презела никакви мерки за истрага коишто и се законска обврска. Не слушнавме дека во истрагата е вклучен и сменоводителот за време на кобната ноќ, којшто не презел мерки за контрола на објектот и обезбедување јавен ред и мир, па во објектот се нашле и малолетни лица.

Дополнително, во време на мандатот на Тошковски е обновена лиценцата на оваа дискотека. Тој е министер повеќе од една година, затоа што тој беше министер и во техничката влада и во сите овие пропусти, директна командна одговорност има Министерот за внатрешни работи, додаде Јанчев.

Втор основ е нелегалната употреба на пиротехнички средства, а трет е неукажувањето помош од страна на полицајците, за време на настанот. Четвртиот основ се непроцесуираните фејзбук - закани упатени кон критичарите на власта во време на колективна траума и јавен револт, а петиот е злоупотребата на МВР, како што велат од партијата, со забраната за дронови со цел задушување на протестите.