Постапка и пријава против дежурниот полицаец, откако мажот со секира ја уби сопругата во Гостивар

Добивај вести на Viber

МВР на барање на Хелсиншкиот комитет за човекови права покренало постапка против дежурниот полицаец, кој не реагирал на пријавата за насилство во Гостивар, каде потоа во септември маж изврши грозоморно убиство со секира над својата сопруга.

Откако биле извршени непосредни и објективни проверки, од МВР биле собрани потребни известувања и бил извршен увид во целокупната документација.

– Поради тоа што полицискиот службеник од ПС Гостивар сторил потешко кршење на работниот ред и дисциплина, Одделот поднел Иницијатива до СВР Тетово за поведување постапка за утврдување дисциплинска одговорност. Исто така Одделот за внатрешна контрола поднел и Известување до Основното јавно обвинителство за гонење на организиран криминал и корупција – Одделение за истражување и гонење на кривични дела сторени од лица со полициски овластувања и припадници на затворската полиција, потврди Хелсиншки.

Инаку веднаш откако синот дознал за семејното физичко насилство врз мајка му сторено од неговиот татко, истата вечер во 21:30 го пријавил случајот кај полицискиот службеник на влезот во дежурната служба.

Полицискиот службеник му побарал телефонски број на синот, му дал насока да биде во близина на куќата на неговите родители и да чека телефонски повик од него. Сето ова поради тоа што сите служби на ПС од ОН Гостивар биле ангажирани за претрес во село Здуње.

Вечерта синот разговарал телефонски со полицискиот службеник, кој поради тоа што било многу доцна му сугерирал следниот ден заедно со мајка му да го пријават таткото за семејното насилство. Утрото околу 6 часот, синот дознал дека таткото ја убил мајката со секира и веднаш го пријавил случајот во ПС од ОН Гостивар.