Повторно „извиси“ предлог-законот за попис

Добивај вести на Viber

Уште една редовна владина седница вчера измина а предлог-законот за попис на населението никако да дојде на дневен ред, иако Апостол Симовски, директорот на Државниот завод за статистика тоа го најави 

Текстот за Законот за попис на населението е изработен уште изминатата есен, а откако ќе биде ставен на дневен ред на редовната владина седница од таму треба да биде испратен на гласање во Собранието.  

Законското решение со кое треба да се започнат официјалните подготовки за пописот во април следната година требаше да виде изгласан уште на почетокот на оваа година. Поради одложувањата се погласни стануваат гласините дека станува збор за неможност да се дојде до договор помеѓу политичките лидери или дека проблем прават одредени детали од оваа демографска статистичка операција.

– Донесувањето на законот за попис заглави поради некои технички проблеми, кои според моите информации сега се надминати. Очекувам дека веќе во вторник законот да се најде на владина седница и истиот да биде усвоен. Проблемот не беше само самиот закон и недоразбирањата кои ги имало, овој период беше мошне интензивен и од други работи, имавме претседателски избори. Во текот на кампањата наша беше иницијативата законот да не биде на дневен ред за да не се злоупотреби во политичката кампања, и сега во вторник очекувам да биде усвоен без никаков проблем, изјави Симовски на почетокот од неделава во интервјуто во „Вечер“.

Додава дека иако законското решение се уште не е донесено, подготовките течат во таа насока. Не верува дека ќе има големо одложување на спроведувањето на истиот, затоа што во декември 2020 ќе има парламентарни избори.