ПРАТЕНИЦИТЕ ДАДОА ЗЕЛЕНО СВЕТЛО: Ќе има надомест за стечајците, а се укинува радиодифузната такса

Добивај вести на Viber

Пратениците во Собранието денеска со 82 гласови „за“ го изгласаа Законот за стечајни работници. 

Со законот се овозможува околу 3.000 стечајци да добиваат месечен надомест од по 7.596 денари, односно 34 проценти од просечно исплатената месечна нето плата минатата година. 

Невработените лица опфатени со законот треба да имаат најмалку 15 години стаж во претпријатија со доминантна сопственост на државата, а таму работниот однос да им престанал по основ на стечај, ликвидација или технолошки вишок, заклучно со 30 јуни годинава. Ќе важи само за стачајци кои на денот на стапување во сила на законот имаат најмалку 52 години за жени, односно 55 години за мажи.

Лицата треба да имаат остварено право на паричен надомест по 1 јануари 1995 година, а по остварувањето на правото на паричен надомест да не биле вработени на неопределено време, односно работниот однос да не им престанал по нивна волја и вина.

За оваа намена од буџетот ќе бидат одвоени околу пет милиони евра годишно.

Усвоен е и законот со кој се укинува плаќањето на радиодифузната такса.  Од идниот месец оваа давачка веќе нема да се плаќа. Со законот се предвидува приходот, што досега го добиваше Македонската радио телевизија, преку собирање на оваа давачка, да се финансира од државниот Буџет. 

МРТ ќе добива 0,5 проценти од буџетот на годишно ниво, или околу 14,3 милиони евра за 2018 година. Покрај од Буџетот, МРТ ќе се финансира и од приходи на кабелските оператори и од приходи остварени со продажбата на програма произведена во МРТ.