ПРЕД УТРЕШНАТА КООРДИНАЦИЈА КАЈ ЏАФЕРИ: ВМРО ДПМНЕ и СДСМ со препукувања за локалните избори
Објавено во: Македонија 14 Мај, 2017
На еден ден пред лидерската коориднација кај собранискиот спикер двете најголеми партии и вечни опоненти ВМРО ДПМНЕ и СДСМ со партиски преписки ги решаат несогласувањата и различните ставови околу локалните избори.
Од партијата на екс премиерот велат дека се поочигледен е стравот на СДСМ да се соочат со граѓаните и да доживеат нов пораз.
Тие велат дека одржувањето на локалните избори нема никаква врска со формирањето на Влада.
„Мандатите на градоначалниците и советите на општините треба да се продолжат во понеделник, но исто така и треба да се донесе најбрз можен датум за одржување на локалните избори.
Прва причина за пролонгирањето на одржувањето на локалните избори не е притисок врз Претседателот на Република Македонија, г-дин Ѓорге Иванов, туку само евтин обид да се купи време за локалните избори да не се одржат во најбрз можен рок, 2-ри јули, од стравот дека ќе бидат катастрофално поразени, а втора причина за обидот на СДС да го одолговлече закажувањето на локалните избори е притисокот кој сакаат да го направат врз ДУИ за нивно пазарење околу коалицискиот договор, бидејќи ДУИ има 14 градоначалници, а СДС само 3“, потенцираат од партијата на Никола Груевски.
Од СДСМ пак велат дека нема да дозволат да биде парализирана државата и дека ќе има и нова влада и локални избори.
„Неразумните блокади од ВМРО-ДПМНЕ веќе ги оставија граѓаните од утре без градоначалници и советници, вработените во општинските установи без плати, луѓето без потребните општински услуги.
Очигледно целта е уште позагрижувачка, хаосот по повеќемесечната блокада за формирање на новата Влада, да се преслика и на локално ниво, што ќе ја парализира целата држава.“, велат од партијата на Заев кој чека мандат за влада. Од СДСМ велат дека сега е на потег Иванов кој мора да се огради од деструктивните политики на Никола Груевски и да го додели мандатот за состав на новата Влада што ќе отвори пат и за локалните избори.