Преку бизнис клуб македонски и швајцарски компании ќе ја зголемуваат деловната соработка
Објавено во: Економија 19 Септември, 2019
Над 40 компании се со стопроцентен швајцарски капитал или дистрибуираат производи или услуги од Швајцарија на македонскиот пазар а овие бројки се очекува да се зголемат со денешното формирање на Македонско - Швајцарски бизнис клуб.
Тој ќе ги здружува силите но и соработката на компании од двете земји, ќе им отвори бројни врати и можности на членовите а и ќе вмрежи илјадници компании. Ќе се зајакнат односите а и придобивките се бројни.
На чело на клубот е Јасминка Талеска, која е и директор на швајцарската компанија „Новартис“ и според неа бизнис клубот ќе им донесе корист на двете страни.
За претседателката на Сојузот на стопански комори на Македонија Даниела Арсовска овој клуб ќе ја продлабочи деловната соработка.
Арсовска вели дека е голем потенцијалот да се унапреди соработката меѓу компаниите од двете земји.
-Обединувајќи ги компаниите кои се со швајцарски капитал и компаниите од Сојузот кои имаат интерес за соработка, веруваме дека ќе дејствуваме кон зголемување на трговската размена, која според статистичките податоци минатата година изнесуваше 105 милиони евра, со остварен извоз од 40 милиони евра и увоз од 65 милиони евра“, посочи Арсовска.
Од друга страна пак заменик амбасадорот на Швајцарија, Стефан Томаџан ветува заложби во чиј фокус ќе биде растот на трговската и економска соработка.За Томаџан формирањето на еден ваков бизнис клуб значи дека билатералните односи на двете земји се добри а е убеден во потенцијалот за зголемена трговија и инвестиции меѓу Македонија и Швајцарија.
Македонско - Швајцарскиот бизнис клуб е формиран со поддршка на Швајцарската Амбасада и Сојузот на стопански комори на Македонија.