ПРИВЛЕЧНОСТА НА ЛИСТИТЕ: Дури 2.000 граѓани сакале да бидат пратеници на СДСМ

Добивај вести на Viber

Пратеничките листи дефинитивно се примамливи за партиските членови и симпатизери. Ова особено важи за добитните, односно за оние што ќе се најдат меѓу првите на списоците во шесте изборни единици, бидејќи тие имаат најголеми шанси да влезат како пратеници во Собранието. 

За да се најдат на пратеничките листи на сега владејачката СДСМ се пријавиле безмалку 2.000 кандидати. Ова денеска го објави лидерот на партијата Зоран Заев, кој нагласи дека тоа се вкупно номинирани за листите, кои се или номинирани од месните одбори, или преку самокандидатура. 

Иако на огласот се пријавиле околу две илјади кандидати, по првичните селекции на локално ниво останале околу илјада, и тие понатаму се селектираат на централно ниво на партијата, согласно анализите и анкетите, но и согласно препораките на селекционата комисија. Имињата на некои од кандидатите во одредени населени места, како што рече лидерот на партијата, се веќе познати, но повеќето сеуште се во процес на избор за учество на листите.

Инаку, како финално ќе изгледаат пратеничките листи на социјалдемократите, ќе биде познато по конгресот во понеделник. 

„За конечните листи ќе одлучиме во понеделник, така што, викендот ќе ни биде работен, и покрај приватните обврски што ги имаме. Верувам дека до последно, како стигнуваат анализите, анкетите, истражувањата, кои се водилка во извештаите во селекционата комисија, ќе следиме, по што ќе се сублимира конечноста на одлуките поврзана со кандидатите. Ќе можеме да соопштиме во понеделник, некои места ги знаеме, но голем дел уште не се знаат“, рече Заев на денешната прес конференција. 

Конкретно, во понеделник во 16 часот ќе се одржи Централен одбор на партијата, а во 18:00 часот следува Конгресот.

Во врска со тоа дали со БЕСА ќе одат со заедничка листа на изборите, поради изјавата на претседателот на ДИК Оливер Дерковски дека со тоа БЕСА ќе загуби членови во Комисијата, но и во избирачките одбори, Заев рече дека коалицијата е објавена, на изборите ќе настапат со заедничка пратеничка листа и со заедничка програма. Додаде дека законот е јасен за сите аспекти и фази на изборите.