ПРОСЕЧНАТА ПЛАТА ВО ФЕВРУАРИ БИЛА 27.206 ДЕНАРИ - колку во март и април ќе ја „удри“ корона кризата
Објавено во: Финансии 21 Април, 2020
Во февруари просечната плата што ја зеле сите вработени во земјава изнесувала 27.206 денари, соопшти Државниот завод за статистика.
Во однос на јануари, кога просечната плата била на ниво од 27.540 денари, излегува дека во февруари просечната плата била намалена за 334 денари.
Треба да се наведе дека во февруари се уште не беше разгорена корона кризата во Европа, ниту, пак, постоеја мерки за ограничување на движењето, што значи дека немало ниту негативни последици за економијата. Односно, заклучок е дека февруарските плати не се погодени од корона кризата.
Во однос на февруари, лани, пак, просечната плата бележи зголемување за 12,5 отсто.
„Според податоците на Државниот завод за статистика, индексот на просечната месечна исплатена нето-плата по вработен во февруари 2020 година, во однос на февруари 2019 година, изнесува 112,5“, се вели во соопштението од Државниот завод за статистика.
Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Стручни, научни и технички дејности (20,1 отсто), Уметност, забава и рекреација (19,3 отсто) и Преработувачка индустрија (17,77 отсто).
Намалување на просечната месечна исплатена нето-плата по вработен, во однос на претходниот месец, е забележано во секторите: Финансиски дејности и дејности на осигурување (14,9 отсто), Рударство и вадење на камен (12,8 проценти) и Транспорт и складирање (11 отсто).