Путин разочаран од конфронтациите со САД, од Трамп побара конструктивност
Објавено во: Свет 30 Декември, 2017
Рускиот претседател Владимир Путин смета дека 2017 година наместо да биде одбележана од доближување на односите меѓу САД и Русија всушност поминала во конфронтации кои се материјализираа и со санкции против Москва, наместо конструктивен дијалог.
Путин затоа му испрати новогодишна телеграма на американскиот претседател Доналд Трамп во која посочи дека односите меѓу САД и Русија се многу важни за светскиот поредок.
„Развојот на конструктивен дијалог помеѓу Русија и САД е исклучително важен за зајакнување на стратешката стабилност во светот и изнаоѓање на оптимални одговори на глобална закана и предизвици“, напиша Путин.
Тој во честитката упатена до Трамп истакна дека Русија и САД би можеле да развијат прагматична соработка насочена кон долгорочна перспектива, на база на еднаквост и взаемна почит.
Сите обиди кои администрацијата на Трамп ги планираше за сојузништво со Русија пропаднаа поради засилената истрага на специјалниот јавен обвинител Мулер кој има задача да откри дали агенти на Путин се мешале во американските претседателски избори и дали биле извршени кривични дела против интересите на САД.
Повеќе лица од кампањата на Трамп се или осомничени или сведоци, па наскоро се очекува и првото посериозно обвинување за вмешаност со руските државни структури.