Радев во јануари повеќе ќе се посвети на темата Македонија, а Османи очекува позитивен исход
Објавено во: Македонија 20 Декември, 2021
Бугарскиот претседател Румен Радев по Нова година повеќе ќе се посвети на темата Македонија.
Бугарскиот Консултативен совет за национална безбедност (КСНС) во врска со темата за нашата земја како што најави Радев ќе биде свикан во првата половина на јануари.
!„Важно е да имаме став на ова политичко тело, за кој и партиите ќе имаат јасна позиција за тоа што треба да се направи за да се забрза процесот на интеграција на Република Северна Македонија во ЕУ, но имајќи го предвид и почитувајќи го бугарскиот национален интерес“, изјави Радев.
Македонскиот шеф на дипломатијата, Бујар Османи очекува дека во јануари може да се постигне договор со Бугарија. Македонија чека повратен одговор од официјална Софија за пакетот барања 5+1 кои беа поставени како услов од бугарска страна за почеток на преговори со Европската Унија.
„Одговоривме на барањето за механизми за спречување на говорот на омраза во двете земји, рехабилитацијата на жртвите на комунизмот, барањето за вклучување на Бугарите во Уставот и работата на историско-образовната комисија. Мислам дека ова е доволно за да се затвори ова прашање, но чекаме одговор од Бугарија во врска со овие ставови, и кои се надевам дека ќе продолжат на средба на високо ниво во наредниот период“, рече Османи.
Османи кажа дека неговиот став е дека доколку има политичка волја, реално не се потребни уште шест месеци за да се држи во неизвесност државата, европската перспектива и регионалната динамика.