Русија и Арапите одлучија: Доста е!
Објавено во: Економија 15 Мај, 2017
Најголемите светски произведувачи на нафта, Русија и Саудиска Арабија, повикаа на продолжување на договорот за намалување на производството на нафта пред состанокот на ОПЕК кон крајот на месецот.
„За да ја нагласиме посветеноста на произведувачите на нафтата со обезбедување на пазарна стабилност, предвидливост и одржлив развој, заедничките акции на произведувачите би требало да бидат продолжени за девет месеци до 31 март 2018 година“, се наведува во заедничкото соопштение на двете земји кое го објави руското министертсво за енергетика.
Во соопштението се додава дека рускиот министер за енергетика Александар Новак и неговиот саудиски колега Калих ал Фалих, кои денес се сретнале во Пекинг, „се согласни да направат се што е потребно за да ja достигнат посакуваната цел за стабилизација на пазарот и намалување на комерцијалните залихи на нафта на нивно петгодишно просечно ниво“.
„Министрите ќе се консултираат со другите земји произведувачи со цел да постигнат консензус за деветмесечно продолжување кое го бараат“, се наведува во соопштението.
Членките на ОПЕК во ноември се договориле да го намалат производството за 1,2 милиони барели дневно во период од шест месеци, почнувајќи од 1 јануари 2017 година, во настојување да ги намалат прекумерните глобални залихи и да ја подигнат цената на црното злато.
Состанокот на ОПЕК е закажан за 25 мај кога членките на нафтениот картел и Русија, како се очекува, ќе го продолжат договорот за намалување на производството.