Русија не успеала да го спречи масакрот во Беслан, ќе мора да плаќа оштета

Добивај вести на Viber

Европскиот суд за човекови права донесе пресуда во корист на тужителите и ја обвини Русија дека не сторила доволно за да ја спречи опсадата на терористите во училиште во Беслан во 2004-та, а дека при спасувачката акција на специјалците било користено премногу тешко оружје со што дошло до огромен број на жртви, од кои за жал околу 200 беа деца од вкупно 330. 

Судот во Стразбур нареди да им се исплатат на тужителите во случајот со терористичкиот напад 2,955 милиони евра како нематеријална штета, а уште 88 илјади евра треба да добијат адвокатите што ги бранеа интересите на тужителите.

Тужби во судот беа поднесени во 2007-2011 година од 409 државјани на Русија кои сметаат дека властите не спровеле „ефикасна истрага“ за терористичкиот напад во Беслан. Во јули 2015 година судот ја прогласи тужбата за прифатлива. 

Според пресудата постоеле голем број на разузнавачки информации дека чеченските терористи се подготвуваат за силна опсада на училиштето и дека имале силно оружје и експлозиви. 

Акцијата на руските специјалци е оценета како хаотична, но со оваа пресуда засега не се согласува Кремљ од каде посочуваат дека во случајот не може да надвладеат емоциите, туку фактите.