Руската полиција изврши рација во домот на истакнатиот новинар Роман Анин

Добивај вести на Viber

Руската полиција накратко го приведе и го испита Роман Анин, еден од водечките истражувачки новинари во земјата, во кривична истрага за која се сомнева дека е мотивирана од одмазда за неговите истраги за елитата на Кремљ.

Истражителите во петокот извршиле претрес во станот на Анин во Москва и заплениле телефони и друга електронска опрема и документи. Анин, основач на iStories и еден од руските репортери кој работел на истрагите за „Панама документите“, потоа бил однесен во полициска станица на распит. Тој одби да одговори на прашања. повикувајќи се на своето право да не сведочи. Во понеделникот повторно е повикан на распит, пишува Гардијан.

Случајот е поврзан со истрагата на Анин во 2016 година за близок соработник на Владимир Путин, чија сопруга, како што напиша тој, се чини дека користела супер-јахта, проценета дека чини повеќе од 100 милиони долари. Новаја Газета, весникот што го објави написот со наслов „Тајната на принцезата Олга“, беше тужен во рускиот суд од страна на шефот на Роснефт, Игор Сечин, кој рече дека написот му нанел штета на неговата репутација.

Се чинеше дека тоа е крајот на приказната. Но, полицијата минатиот месец одеднаш ја обнови кривичната истрага од 2016 година за нарушување на приватноста и го наведе Анин како сведок во случајот. Тој не е обвинет како осомничен.

Анин е еден од неколкуте руски истражувачки репортери кои искористија документи што протекоа за да се разоткрие задкулисното работење на Кремљ за луѓе блиски до Путин. Минатата година, iStories објави протечени мејлови испратени и примени од поранешниот зет на Путин, изложувајќи го богатиот начин на живот што го уживала една од ќерките на Путин. Минатиот месец, iStories објави статија во која се потврдуваат врски помеѓу висок командант на ФСБ и криминалното подземје.

Уредничкиот одбор на Новаја Газета, весникот што го објави написот во 2016 година, напиша дека Анин бил мета на повеќе кривични истраги, вклучувајќи и друга пријава покрената од Сечин против iStories. „Сè што се случува во моментов со Роман Анин е одмазда“, напиша весникот.

Анин беше ослободен од ќелијата доцна во петокот вечерта. Во забелешките пред новинарите, тој рече дека истражителите „однеле сè“. 

- Ги зедоа сите мемориски стикови, сите компјутери, вклучувајќи ги и оние што не беа мои. Зедоа телефони што не ми припаѓаа мене. Тие зедоа документи, рече тој и наведе дека случајот е врзан за приказната за супер-јахтата, додавајќи дека тој целосно се потпирал на јавни фотографии достапни на Инстаграм.

Колегите од руски и меѓународни организации за известување издадоа соопштенија за поддршка на Анин.