Само четири жени дел од „дрим тимот“ на Заев во новиот владин кабинет

Добивај вести на Viber

Уште пред да биде изгласана новата влада лидерот на ДУИ се соочи со низа критики. 

На социјалните мрежи се почести се реакциите зошто идниот коалиционен партнер на СДСМ нема во листата кандидати за министри ниту една жена.

Меѓу нјагласните критичари се јавија професорките Мирјана Најчевска и Каролина Ристова Астеруд.

„Се уште жените се видливо малцинство (воопшто ги нема меѓу предлозите на партиите на етничките Албанци). Тоа што има толку малку жени е проблем, голем проблем да се разбереме“, пишува Најчевска на Фејсбук коментирајќи ги предлозите за идни министри.

Разочараност и кај професорката од Правен факултет Каролина Ристова Астеруд.

„И, ете така, Али Ахмети ќе ја внесува Македонија во НАТО и ЕУ, кои од уста не ги вади, без жените Албанки, поточно,без ниту една жена од ДУИ за министерка. Од шест места, ниту една, камоли две-три, па некако да го креневме општиот „рекорд“ од 4 на барем 5! Тоа е тој европски идентитет, онака, во ум, душа и срце, во најдестилираната форма. Не дека СДСМ и другите се многу понапред и дека се претегнале. Толку од реформскиот дух во тој дел, а сепак многу, многу индикативен! МЕГАРАЗОЧАРАНА!“, пишува Ристова Астеруд.

Од редовите на ДУИ кандидати министри се Хазби Лика вицепремиер за рамковен договор, Бујар Османи вицепремиер за евроинтеграции, Билент Салиу министер за правда, Крешник Бекташи министер за економија, Рамиз Мерко е министер без ресор и Садула Дураку, министер за животна средина.

Во листата на СДСМ за министри со ресор пак има три жени: Радмила Шеќеринска - министер за одбрана, Рената Десковска - министер за образование и Мила Царовска - министер за труд и социјала, додека Зорица Апостолска од НСДП е предолжена за министер без ресор.

На чело на Министерството за одбрана за прв пат застанува жена. Најголемиот предизвик на Радмила Шекеринска ќе биде да ја внесе Македонија во НАТО.

На чело на Министерството за образование застанува универзитетски професор. Заев ја предложи Рената Десковска да раководи со овој ресор, а првиот чекор кој СДСМ вети дека ќе го исполни со стапувањето на власт е укинување на екстерното образование.

Социјалата ја доби Мила Царовска, која беше претседател на Комисијата за труд и социјална политика на СДСМ. Царовска ја чека напорна работа со сиромаштијата, маргинализираните групи, а во нејзиниот ресор е и армијата од пензионери.

Зорица Апостолска од НСДП е четвртата жена во идниот владин кабинет која е предложена за министер без ресор.